
Si pajtohet Trinia me besimin në të vetmin Hyj të Besëlidhjes së Vjetër? (TR)
Përgjigje:
Jezusi u rrit në fenë e popullit të tij, të themeluar mbi monoteizmin, domethënë mbi besimin në një të vetëm Hyj, që është qendror në të gjithë Besëlidhjen e Vjetër. Edhe dishepujt e tij ishin, pra, thellësisht monoteistë.
Megjithatë, përmes fjalëve dhe veprave të Jezusit, dishepujt kuptuan gradualisht se ai nuk ishte vetëm një profet: ai vepronte me autoritetin e Hyjit, falte mëkatet, shëronte dhe ngjallte të vdekurit. Vetë Jezusi pohoi se në të ishin të pranishëm Hyji dhe Mbretëria e tij.
Të udhëhequr nga Shpirti i Shenjtë, të krishterët e parë e njohën kështu Jezusin si Birin e Hyjit (krh. Mt 16,13-20), pa e konsideruar këtë besim si një mohim të të vetmit Hyj.
Prandaj, besimi në Trininë e Shenjtë nuk e mohon monoteizmin e Besëlidhjes së Vjetër, por e thellon atë: i vetmi Hyj është Ati, Biri dhe Shpirti i Shenjtë.
Kisha e ka formuluar këtë besim në dritën e jetës, vdekjes dhe ngjalljes së Jezusit dhe të kuptimit që apostujt dhe bashkësitë e para të krishtera patën për të, nën veprimin e Shpirtit të Shenjtë.
253 «Trinia është Një. Ne nuk pohojmë tre perëndi, por një të vetëm Hyj në tre Persona: “Trinia e njëqenësishme”. Personat hyjnorë nuk e ndajnë hyjninë e vetme, por secili prej tyre është Hyji i tëri: “Ati është gjithçka që është Biri, Biri është gjithçka që është Ati, Shpirti i Shenjtë është gjithçka që janë Ati dhe Biri, domethënë një Hyj i vetëm për nga natyra”. “Secili prej tre Personave është ai realitet, domethënë substanca, thelbi ose natyra hyjnore”.»
254 «Personat hyjnorë janë vërtet të dallueshëm nga njëri-tjetri. “Hyji është një, por jo i vetmuar”. “Ati”, “Biri” dhe “Shpirti i Shenjtë” nuk janë thjesht emra që tregojnë mënyra të Qenies hyjnore; ata janë vërtet të dallueshëm nga njëri-tjetri: “Biri nuk është Ati, Ati nuk është Biri dhe Shpirti i Shenjtë nuk është Ati ose Biri”. Ata dallohen nga njëri-tjetri për marrëdhëniet e tyre të prejardhjes: “Ati është ai që lind, Biri është ai që lindet, Shpirti i Shenjtë është ai që buron”. Njësia hyjnore është Trini.»
Es freut mich, dass Sie die Texte unserer Webseite https://antwortenanmuslime.de auf www.amicidilazzaro veröffentlichen wollen und erlauben es gerne.
P. Christian W. Troll SJ (30/4/22)

